പ്രശാന്തിയിലേക്കുള്ള വഴി

അടിച്ചു തെളിച്ചു വന്ന ഒഴുക്കിൽ അശുദ്ധമായ പുഴ ഒഴുകി ഒഴുകി തെളിഞ്ഞതാവും. ആകാശത്തു നിന്നും പെയ്തു വീണ കുളിരിൽ തളിരിട്ട് മരങ്ങൾ സമൃദ്ധി വീണ്ടെടുക്കും. വേനൽച്ചൂടിൽ ഉണങ്ങിപ്പോയ ഭൂമി മഴവർഷമേറ്റ് പച്ച വിരിക്കും. മനുഷ്യ മനസ്സിൽ അടിഞ്ഞു കൂടിയ മാലിന്യങ്ങൾ കഴുകിത്തുടയ്ക്കാൻ സൂഫി ഗുരുക്കന്മാരുടെ അമൃതവാണികൾക്ക് കഴിയും. ഇമാം അബ്ദുല്ലാഹിൽ ഹദ്ദാദിന്റെ മജ്‌ലിസിൽ ഇരിക്കുമ്പോൾ ശിഷ്യന്മാരിൽ സംഭവിക്കുന്നത് അതാണ്. ഹദ്ദാദ് തങ്ങളുടെ ഈ രചന ഗുരുവിന്റെ മുന്നിലിരുന്ന് ഉപദേശം കേൾക്കുന്ന പ്രതീതിയാണ് ജനിപ്പിക്കുന്നത്. അന്നസ്വാഇഹുദ്ദീനിയ്യ വൽ വസ്വായാ അൽ ഈമാനിയ്യ എന്ന കൃതിയുടെ മൊഴിമാറ്റമാണ് ഈ പുസ്തകം.