തളിരിലകൾ
നല്ല എഴുത്തുകാരൻ വൈദ്യനെപ്പോലെയാണ്. അയാൾ സമൂഹത്തെ ചികിത്സിക്കുന്നു. അതിനു വേണ്ടിയുള്ള മരുന്നുകൾ ആലോചിച്ചു നടക്കുന്നു. ആ നിലയ്ക്ക് ഫൈസൽ അഹ്സനി ഉളിയിൽ എന്ന എഴുത്തുകാരൻ തീർച്ചയായും ഒരു വൈദ്യൻ തന്നെ. ആളുകളെ സൗമ്യമായി ചികിത്സിക്കുന്ന ഒന്നാന്തരം വൈദ്യൻ. അതിനു അഹ്സനി നമ്മുടെ മണ്ണിൽ നിന്നും ചുറ്റുപാടുകളിൽ നിന്നും അനുഭവങ്ങളെ സ്വീകരിക്കുന്നു. സാമൂഹ്യരോഗങ്ങളെ കണ്ടെത്തുന്നു. Organic Writing എന്ന് നമുക്കിതിനെ വിളിക്കാം. സൈദ്ധാന്തികതയുടെ രാസവളമൊന്നും ഈ കുറിപ്പുകളിൽ ചേർന്നിട്ടില്ല. - അവതാരികയിൽ ശിഹാബുദ്ദീൻ പൊയ്ത്തുംകടവ് ജീവിതത്തിന്റെ വ്യത്യസ്തഭാവങ്ങൾ വരച്ചു കാട്ടുന്നതിൽ എഴുത്തുകാരൻ വിജയിച്ചിരിക്കുന്നു. വായിക്കുവാൻ പ്രേരിപ്പിക്കുന്ന രീതിയിൽ സരളമാണ് മിക്ക ലേഖനങ്ങളും രചിച്ചിരിക്കുന്നത്. നർമ്മബോധവും ആത്മീയതയിലൂന്നിയ ദാർശനികബോധവും ഒരു പോലെ സമ്മേളിച്ച ഈ രചന വായനക്കാർ ഇഷ്ടപ്പെടുമെന്നുറപ്പാണ്. - പ്രൊഫ. ടി.പി. അഷ്റഫ്
